We will fetch book names as per the search key...
ଜୀବନ ହସମୟ ବହିଟି ସମ୍ପର୍କରେ
ଟିକେ ନିରେଖି ଦେଖିଲେ ଜାଣିହେବ କି ଆମେ ସମସ୍ତେ ଗୋଟେ ଗୋଟେ କାର୍ଟୁନ୍! ଆମର ଚାଳିଚଳଣି, ଗତିବିଧି, କାମଦାମ ସବୁକିଛି ଆନନ୍ଦଦାୟକ । ବାସ୍ ଏହାକୁ ନିରେଖି ଦେଖିବାକୁ କିନ୍ତୁ ଗୋଟିଏ ହାସ୍ୟକାରର ଦୃଷ୍ଟି ଦରକାର । ଯେଉଁଦିନ ଆପଣ ନିଜ ଭିତରର କାର୍ଟୁନ୍ଟିର ଦର୍ଶନଲାବ କରିବେ ସେଦିନ ଆପଣ ଶହେ ଶତକଡା ମଣିଷ ପାଲଟିଯିବେ । ତେବେ ପ୍ରଶ୍ନ ହେଲା ଏବେ କଣ ଆପଣ ମଣିଷ ହୋଇ ନାହାନ୍ତି? ଏ କଥା ଯାହାକୁ ପଚାରିବେ ସିଏ ହସିବ । କେହି ବି ସିଧା କହିବନି କି ହଁ ଆପଣ କି ତୁ କି ତମେ ଜଣେ ମଣିଷ! ଅତଏବ ଆମ ସମାଜରେ ମଣିଷ ତୁଳନାରେ କାର୍ଟୁନଙ୍କ ସଂଖ୍ୟା ଅଧିକ । ସେମିତି କିଛି ଲୋକପ୍ରିୟ କାର୍ଟୁନମାନଙ୍କର ଜୀବନ ନାନା ଘଟଣା ଦୁର୍ଘଟଣାକୁ ବର୍ଣ୍ଣନା କରାଯାଇଛି ଏହି ବହିଟିରେ ସ୍ଥାନିତ କବିତାଗୁଡିକରେ । ମୁଁ ନିଜକୁ ମଧ୍ୟ ଏଥିରୁ ବାଦ୍ ଦେଇ ନାହିଁ । କାରଣ ଆମେ ପରକଥା ଶୁଣିବାରେ ଆଗ୍ରହ ରଖୁ । ତେଣୁ ମୁଁ ଆପଣଙ୍କର ଇଚ୍ଛାକୁ ସମ୍ମାନ ଦେଇ, ମନକଥା ବୁଝି ମଝିରେ ମଝିରେ ନିଜକଥା ଟିକେ ଲେଖି ଦେଇଛି । ପ୍ରେମ ନାମରେ ଚାଲୁଥିବା ପ୍ରହଶନ ମଣିଷର ଯାବତୀୟ ଲୋଭ ବେଲଜ୍ଜାପଣକୁ ଏଇ ବହିରେ ମୁଁ ଟିକେ ରାନ୍ଧିକି ଦେଇଛି । ନେତାଏ ନଥିଲେ ତ କାର୍ଟୁନ୍ ନଥାନ୍ତା, ତେଣୁ ତାଙ୍କର ସିରିଜ୍ ଏଥିରେ ରହିଛି । ମଣିଷ ତ ଭଗବାନଙ୍କୁ ଗଢିଚି । ତେଣୁ ଦେବାଦେବୀଙ୍କ ଜରିଆରେ ମଧ୍ୟ କିଛି ହାସ୍ୟ ସୃଷ୍ଟି କରିବାର ଉଦ୍ୟମ ହୋଇଛି ।
ଆମ ମାନଙ୍କର ସମ୍ପର୍କ ମଧ୍ୟ ବଡ ବିଚିତ୍ର । ଆଗରେ ମୁଚୁକୁନ୍ଦ, ପଛରେ କାନ୍ଦକାନ୍ଦ ନଚେତ କୀଳା ଖୁନ୍ଦ । ଏମିତି ସବୁ ନିତିଦିନିଆ ଜୀବନର ହସହସ ଶବ୍ଦଛବି ହେଉଛି ଏ ବହି । ସମସ୍ତେ ସମସ୍ତଙ୍କର, କେହି କାହାର ନୁହନ୍ତି । ଯେଉଁ ସମ୍ପର୍କ ଇସ୍ପାତ ପରି ମଜଭୁତ ହେଉଛି, ସିଏ ଦିନ କେତେରେ କଳଙ୍କି ଖାଇ ଭାଙ୍ଗିଯାଉଛି । ଫେସ୍ବୁକ୍ର ଫ୍ରେଣ୍ଡ୍ ଓ ପାରିବାରିକ ସମ୍ପର୍କ ଭିତରେ ଫରକ କମି ଆସିଲାଣି । ଏବେ ସମସ୍ତେ ଦୂରରେ । ତେଣୁ ହଜାର ହଜାର ନିଜ ଲୋକଙ୍କ ମେଳରେ ଆମେ ଅତ୍ୟନ୍ତ ଏକୁଟିଆ । ଚାଡିଆଡେ ଅସୁବିଧା! ସବୁକିଛି ବଦଳେଇ ଦେବା ଆମ ଦ୍ୱାରା ସମ୍ବବ ନୁହେଁ । ତେବେ ଏତେ ଟେନ୍ସନ ନେବା କାହିଁକି? ବନ୍ଧୁ ଟିକେ ହସନ୍ତୁ ଏବଂ ମୋ ସହ ସମସ୍ୱରରେ କୁହନ୍ତୁ-ଜୀବନ ହସମୟ!
ଏହି କବିତା ଗୁଡିକ ବିଶିଷ୍ଟ ସାମ୍ବାଦିକ ଶ୍ରୀଯୁକ୍ତ ନବୀନ ଦାସଙ୍କ ସମ୍ପାଦନାରେ ପ୍ରକାଶ ପାଉଥିବା ଦୈନିକ “ନିର୍ଭୟ”ରେ ମୁଁ ଲେଖୁଥିବା ରବିବାରୀୟ ସ୍ତମ୍ଭ ଜୀବନ ହସମୟରେ ପ୍ରକାଶିତ । ମୋ ବିଷୟରେ ମୁଁ ବେଶୀ କିଛି କହୁନାଇଁ । କାରଣ ସମସ୍ତଙ୍କୁ ବ୍ୟଙ୍ଗ କରୁଥିବାରୁ, ଧରାଧରି ଏବଂ ତେଲ ମରାମରି କରୁନତିବାରୁ ମୋତେ କୈାଣସି ନାମଜାଦିଆ ପୁରସ୍କାର ଫୁରସ୍କାର ମିଳିନି କି ମିଳିବାର ନାହିଁ । ତେଣୁ ଯଦି ମୋ କବିତା ଆପଣକୁ ଆନନ୍ଦ ଦେଲା ବୋଲି କୈାଣସିମତେ ଟିକେ ଖବର ଦେବେ ତାହା ଜାଣି ମୋର ଛାତି କୁଣ୍ଢେମୋଟ ହେବ!
ପ୍ରେମାଧୀନ
ଡଃ.କୁଳାଙ୍ଗାର