About Book:

‘ଭିନ୍ନ ମଣିଷ’ ଗଳ୍ପ ସଙ୍କଳନରେ ସ୍ଥାନିତ ଗପଗୁଡିକ ମାଧ୍ୟମରେ ଆମେ ପ୍ରତିଦିନ ଭେଟୁଥିବା ଅନେକ ଚରିତ୍ର ଓ ଘଟଣାକୁ ଉପସ୍ଥାପନ କରାଯାଇଛି । କିଛି ସତ ଏବଂ କିଛି କଳ୍ପନାର ଫେଣ୍ଟା ଫେଣ୍ଟି ଭାବ ରହିଛି ଗଳ୍ପ ଗୁଡ଼ିକରେ । ଗଳ୍ପ ଗୁଡ଼ିକର ଭାଷା ମଧ୍ୟ ଅତି ସାଧାରଣ । ଯେକେହି ମଧ୍ୟ ଏହି ଗଳ୍ପ ଗୁଡିକୁ ପଢିଲେ ଗାଳ୍ପିକାଙ୍କର ମାନସିକ ବିଚାରବୋଧକୁ ସହଜରେ ବୁଝିପାରିବେ । ଆମର ବିଶ୍ବାସ ଉକ୍ତ ଗଳ୍ପ ସଂକଳନଟି ପାଠକୀୟ ଶ୍ରଦ୍ଧାଭାଜନ ହୋଇପାରିବ ।

About the Author:

ଶ୍ରୀମତୀ ସାନୁଜା ମେଘମାଳାଙ୍କ ଜନ୍ମ ୧୯୬୮ ମସିହା ମେ' ମାସ ୧ ତାରିଖରେ ଜଗତସିଂହପୁର ଜିଲ୍ଲା ବାଲିକୁଦା ବ୍ଲକ, ଅଳାଭର ପଞ୍ଚାୟତର ଜହିନାବାଦ ଗ୍ରାମରେ । ସେ ସାଧାରଣ ଗୃହିଣୀଟିଏ । ପରିବାରର ଦାୟିତ୍ୱ ତୁଲାଇବା ସହିତ ନିଜସ୍ୱ ଆଗ୍ରହ ଯୋଗୁଁ ସମାଜ ସେବା ସହିତ ଜଡ଼ିତ । ଓଡ଼ିଆ ଗଳ୍ପ, କବିତା ଓ ଉପନ୍ୟାସ ପଢିବା ହେଉଛି ତାଙ୍କ ରୁଚି । ବର୍ତ୍ତମାନ ସେ ଭୁବନେଶ୍ୱରରେ ଅବସ୍ଥାପିତ । ସାହିତ୍ୟ ସହ ତାଙ୍କ ପ୍ରଥମ ସମ୍ପର୍କ ହୋଇଥିଲା ସପ୍ତମ ଶ୍ରେଣୀରେ 'ଟମକକାଙ୍କ କୁଟୀର' ବହିଟିକୁ ପଢି । ଗାଳ୍ପିକାଙ୍କ ବାପାଙ୍କ ସାହିତ୍ୟ ପ୍ରତି ରୁଚି ଯୋଗୁଁ ଘରକୁ ଗୁଡ଼ିଏ ବହି ଆସୁଥିଲା । ସେତେବେଳେ ତାଙ୍କ ବାପା ମଧ୍ୟ କିଛି ପତ୍ରିକା ପାଇଁ ଲେଖାଲେଖି କରୁଥିଲେ । ବାପାଙ୍କ ଦ୍ୱାରା ଅନୁପ୍ରାଣିତ ହୋଇ ଅଷ୍ଟମ ଶ୍ରେଣୀରେ ପଢିଲା ବେଳେ ତାଙ୍କ ସ୍କୁଲ୍ ର ବାର୍ଷିକ ପତ୍ରିକାରେ ପ୍ରଥମେ ଲେଖା ପ୍ରକାଶିତ ହୋଇଥିବା ସେ ସ୍ଵୀକାର କରନ୍ତି । ଗାଳ୍ପିକାଙ୍କ ଲେଖା କେବଳ ସ୍କୁଲ୍, କଲେଜର ବାର୍ଷିକ ପତ୍ରିକା ଭିତରେ ହିଁ ସୀମିତ ଥିଲା । ତେବେ ଷ୍ଟୋରୀମିରର୍ ତାଙ୍କୁ ଲେଖିବାର ସୁଯୋଗ ଆଣି ଦେଇଥିବାରୁ ସେ ଅତ୍ୟନ୍ତ ଖୁସି ବ୍ୟକ୍ତ କରନ୍ତି । ସୂଚନାଯୋଗ୍ୟ ଯେ, ଏହା ଗାଳ୍ପିକାଙ୍କ ପ୍ରଥମ ପ୍ରକାଶିତ ଗଳ୍ପ ସଂକଳନ ।