ବର୍ଷା (Barsha)

ଅଭିଧାନର କ୍ଳୀଷ୍ଟ, ଦୁର୍ବୋଧ୍ୟ ଶବ୍ଦ ନୁହେଁ, ଅତି ସରଳ କଥିତ ଶବ୍ଦକୁ ନେଇ ଯେ ସୁନ୍ଦର କବିତା ଲେଖା ଯାଇପାରେ ଡାକ୍ତର ବିଜୟ କୁମାର ପୃଷ୍ଟିଙ୍କ କବିତା ସବୁ ପଢିଲେ ଯେ କେହି ଏ କଥାର ସତ୍ୟତାକୁ ଅନୁଭବ କରି ପାରିବ | ସ୍କୁଲରେ ପାଠ ପଢିବା ସମୟରୁ କବିତା ଲେଖି ଆସୁଥିବା କବିଙ୍କ ସମ୍ପାଦନାରେ "ପଲ୍ଲୀ ନିର୍ଝର" ନାମରେ ଏକ ସାହିତ୍ୟ ପତ୍ରିକା କାକଟପୁରରୁ ୧୯୭୪ରେ ପ୍ରକାଶିତ ହୋଇ ଆସୁଥିଲା | କବିଙ୍କର ପ୍ରଥମ କବିତା ସଂକଳନ "ନିଷିଦ୍ଧ ଉପତ୍ୟକା" ୧୯୮୭ ମସିହାରେ ପ୍ରକାଶିତ ହୋଇଥିଲା | ବିଭିନ୍ନ ସମୟରେ ବିଭିନ୍ନ ପତ୍ର ପତ୍ରିକା ତଥା ଖବର କାଗଜରେ କବିଙ୍କର କବିତା ଓ ଅଣୁଗଳ୍ପ ପ୍ରକାଶିତ ହୋଇ ଆସୁଛି | ଫେସବୁକରେ "ବେସୁରା ଗୀତି" ସିରିଜରେ କବିଙ୍କର ପ୍ରାୟ ୧୪୬୪ଟି କବିତା ପ୍ରକାଶିତ ହୋଇ ପାଠକ ମାନଙ୍କ ଦ୍ୱାରା ଆଦୃତ ହୋଇଛି | "ବର୍ଷା" କବିତା ସମୁହ କବିଙ୍କର ବର୍ଷା ପ୍ରତି ଥିବା ଦୁର୍ବଳତାର ନିଖୁଣ ଚିତ୍ର ବହନ କରେ | 

ସାଧାରଣ ଆଖିରେ ବର୍ଷା ଏକ ପ୍ରାକୃତିକ ପ୍ରକ୍ରିୟା, ହେଲେ କବିର ଆଖିରେ ବର୍ଷା କେତେବେଳେ ଗୋଟିଏ ଅମାନିଆଁ ଅଝଟ ଝିଅ ପାଲଟି ଯାଏ ତ କେତେବେଳେ ଆକାଶ ଆଖିର ଲୁହ ହୋଇ ଝରୁଥାଏ | ମୋ ଆଖିରେ କିନ୍ତୁ ବର୍ଷା ଧରା ପଡିଯାଇଥିଲା ଏକ ଅମାନିଆଁ ଅଭିମାନିନୀ ପ୍ରିୟତ୍ତମା ରୂପରେ | ମୁଁ ତା ସହ ହସୁଥିଲି, ଗପୁଥିଲି, ସୁଖ, ଦୁଃଖ, ମାନ, ଅଭିମାନ ବାଣ୍ଟୁଥିଲି | କେତେବେଳେ ସେ ମୋ ଆଖିରେ ଲୁହ ଦେଉଥିଲା ତ କେତେବେଳେ ମୋ ଆଖିରୁ ଲୁହ ନେଇ ନିଜେ ଝରି ଯାଉଥିଲା | ସେ ଆସିଲାବେଳେ ତାକୁ ଶ୍ରାବଣ ସହିତ ସ୍ୱାଗତ କରିଥିଲି ତ ଭାଦ୍ରବରେ ବିଦାୟ ଦେଇ ପୁଣି ଶ୍ରାବଣକୁ ସାଥିରେ ଫେରିବାକୁ ନିମନ୍ତ୍ରଣ ଦେଇଥିଲି | ବର୍ଷା କବିତା ଗୁଛର ପ୍ରତିଟି କବିତା ଏହି ଭାବାବେଗ କୁ ନେଇ ଗତିଶୀଳ | ଆଶାକରେ ପାଠକ ମାନଙ୍କ ଦ୍ୱାରା ଏହି ସଂକଳନଟି ଆଦୃତ ହେବ | - ବିଜୟ ପୃଷ୍ଟି